Быйыл Кыргызстан эт азыгы менен өзүн 89%га камсыз кылды
2022-жылы Кыргызстан канаттуулар эти, мал чарбачылыгынан өндүрүлгөн эт азыктары менен өзүн өзү 89%га камсыз кылды. Бул тууралуу Айыл чарба министри Аскарбек Жаныбеков “Кабар” маалымат агенттигинде өткөн маалымат жыйынында билдирди.
Анын айтымында, былтыркы жылга салыштырмалуу көрсөткүчтөр жогору. 2021-жылы өлкө өзүн азыктык буудай менен 40%га камсыздаган болсо, быйыл ал көрсөткүч 72%га чыкты.
“Аянт азайганына жана кант кызылчасы быйыл 9 миң гектарга себилгенине карабастан, өндүргөн кумшекер былтыркыга салыштырмалуу 25%дан ашты. Ошентип быйыл 65%га өзүбүздүн өндүргөн кумшекер менен камсыз кылып жатабыз.
Негизги деген азыктардын ичинен сүт, картөшкө менен камсыз кылдык. Ушул позициядагы азыктарга быйыл дээрлик эт азыгы да кирип жатат, быйыл эт менен 89%га камсыз кылып жатабыз”, – деди министр.
Ошондой эле Жаныбеков өсүмдүк майы көрсөткүчтөрдү артка тартып турганын, былтыр камсыз кылуу 12% болсо, бул жылы ал 20%га жеткенин кошумчалады.
