«Кыргызстан» санаториясын кайра курууга 31 млн доллар сарпташат – ордуна мейманкана, спорт комплекси, коттедждер курулат

Туризмди өнүктүрүүнү колдоо фонду «Кыргызстан» санаторийин өнүктүрүү боюнча бизнес-планы менен тааныштырды. Презентация Кыргызстан профсоюздар федерациясынын кеңешинин мүчөлөрү менен болгон жумушчу жолугушууда өттү. Бул тууралуу аталган фонддун маалымат кызматы билдирди.

Фонддун өкүлдөрү Кыргызстанда санаториялык-курорттук мекемелердин тармагын өнүктүрүүнү көздөп жатышканын айтышты. Долбоор 32 объекттин курулушун камтыйт. Буга чейин Туризм боюнча улуттук кеңеш алардын 25и калыбына келтирилерин, ал эми жетөөсү гана нөлдөн курула турганын билдирген. Алар КРнын ар бир облусунда бирден курулат.

Алдын ала эсептөөлөр боюнча санаторийлердин тармагын өнүктүрүү программасын ишке ашыруу үчүн 960 млн долларга жакын каражат керектелет. Бул көрсөткүч КРдагы эс алуу, реабилитациялык борборлорго жана курортторго жумшалган инвестициялардын орточо көлөмүнө жараша аныкталат.

Тармак өлкөдө медициналык туризмди өнүктүрүү, туристтик агымды жана туристтик сезондун узактыгын жогорулатуу, КРнын жарандарына эс алуу үчүн жаңы мүмкүнчүлүктөрдү берүү максатында иштелип чыккан. Ар бир объект боюнча өзүнчө биргелешкен ишкана, бизнес-план түзүлүп, инвестиция тартылат.

Фонд пилоттук долбоор катары «Кыргызстан» санаториясын модернизациялоону сунуштап жатат. Бул объект Союз учурунда Чүй облусунун Аламүдүн районунда курулган жана Профсоюздар федерациясына карайт.

Санаторийди өнүктүрүү боюнча сунушталган бизнес-планга ылайык, 25 гектар жерге 250 бөлмөлүү башкы корпус, бассейндери бар спорттук-эс алуу комплекси, боз үй түрүндөгү эки кабаттуу конференц-зал жана 20 корпустан турган коттедж шаарчасы курулат. Долбоор 31 млн долларды талап кылат, өзүн актоо 5.5 жылга созулат.