Президент Садыр Жапаров окумуштууларга каржылык автономия берди
Президент Садыр Жапаров илим тармагын реформалоо жана анын натыйжалуулугун жогорулатуу жөнүндө Жарлыкка кол койду. Документ ата мекендик илимдин атаандаштыкка жөндөмдүүлүгүн жогорулатууга, ошондой эле илим, билим берүү жана өндүрүш ортосундагы байланыштарды бекемдөөгө багытталган.
Жарлыкка ылайык, Улуттук илимдер академиясы, анын илимий мекемелерине, ошондой эле министрлер кабинетине караштуу илимий жана илимий-техникалык уюмдарга, мамлекеттик органдарга жана жогорку окуу жайларына каржылык автономия берилет.
Бул алардын мыйзам менен тыюу салынбаган багыттарда — илимий изилдөөлөр, билим берүү жана консультациялык кызматтар, коммерциялык ишмердүүлүк жана башка иштер аркылуу — өз алдынча каражат таба ала турганын билдирет.
Мекемелерге ошондой эле өз кирешелерин өз алдынча пайдаланууга уруксат берилет: аларды кызматкерлердин айлыгын көтөрүүгө, материалдык-техникалык базаны өнүктүрүүгө жана кошумча сыйлыктарга жумшоого болот.
Мындан тышкары, алар акы төлөнүүчү кызматтарга тарифтерди өз алдынча белгилеп, мүлктү, анын ичинде ижарага берүү аркылуу пайдаланууга укуктуу болушат.
Өзүнчө белгиленгендей, жогорку окуу жайлар жыл сайын атайын эсептердеги каражаттардын кеминде 3%ын илимий изилдөөлөрдү өнүктүрүүгө жана карамагындагы илимий уюмдардын базасын жакшыртууга багыттоого тийиш.
Министрлер кабинетине алты айлык мөөнөттө илимий мекемелердин кызматтарына инвентаризация жүргүзүү жана өз чечимдерин Жарлыкка ылайык келтирүү тапшырмасы берилди.
Эске салсак, 2020-жылы өлкө башчысы "Илимдер академиясы музейге эмес, иш канаган жерге айланышы керектигин" баса белгилеген. Кийин академиянын имараты толук капиталдык оңдоодон өткөндөн кийин да өлкө башчы бул мекемеге барып, жаңыланган имарат менен таанышкан.
