Кытайлык инвесторлор Кыргызстанга санитардык буюмдарды чыгаруучу завод курууну көздөшүүдө
Кытайдан келген инвесторлор Кыргызстанда санитардык-гигиеналык буюмдарды чыгаруучу завод курууну пландоодо. Бул тууралуу Улуттук инвестициялык агенттиктин директорунун орун басары Нурадил Баясовдун кытайлык ARROW корпорациясынын өкүлдөрү менен жолугушуусунда белгилүү болду.
Жолугушуу КРнын Гуанчжоу шаарындагы башкы консулдугунун көмөгү менен өттү. Консулдук аталган компания менен бир жылдан бери сүйлөшүүлөрдү жүргүзүп келген.
“Кытайлык инвесторлордун иш сапарынын максаты ЕАЭБ, Борбордук Азия жана Европанын рынокторун өнүктүрүү үчүн Кыргызстанда санитардык-техникалык буюмдарды чыгаруучу завод куруу мүмкүнчүлүгүн сүйлөшүү болуп саналат”, – деп айтылат маалыматта.
Жолугушууга Кытай тараптан ARROW эл аралык кызматташтык департаментинин аймактык директору Женни Пенг келген.
КЭРдин Улуттук корпоративдик кредиттик маалымат системасынын маалыматы боюнча, товардык белги 2013-жылы катталган, 2022-жылдын августунда компания Шэньчжэнь фондулук биржасына кирип, бир айдын ичинде 200 млн доллардан ашык каражат чогулта алган. Компаниянын жылдык жүгүртүүсү 1.5 млрд долларды түзөт.
