Кыргызстанда азык-түлүк баалары: эмне кымбаттап, эмне арзандады?
Кыргызстанда социалдык жактан маанилүү товарлардын баалары туруктуу бойдон калууда. Бул тууралуу Монополияга каршы жөнгө салуу кызматынын акыркы мониторингинин жыйынтыгында маалымдалды.
2026-жылдын 25-мартынан 3-апрелине чейинки мезгилде айрым товарларга баа бир аз өзгөргөн. Тактап айтканда, кумшекер 0,5%га, сабиз 1,4%га кымбаттаган. Адистер муну сезондук фактор менен түшүндүрүшөт.
Ал эми жумуртка 3,3%га, пияз 2,3%га жана күрүч 0,4%га арзандаган. Калган товарлар боюнча баалар дээрлик өзгөргөн эмес.
Мониторинг ошондой эле ЕАЭБ өлкөлөрү жана коңшу мамлекеттер менен салыштырмалуу жүргүзүлгөн. Жыйынтыгында Кыргызстанда көпчүлүк социалдык товарлардын баасы башка өлкөлөргө салыштырмалуу төмөн экени белгиленди.
Мисалы:
- кумшекер Кыргызстанда орточо 77 сом болсо, Тажикстанда 128 сом;
- күн карама майы — 159,7 сом (Казакстанда 245,5 сом);
- 1-сорттогу ун — 34,9 сом (Арменияда 85,1 сом).
Этке болгон баалар да Кыргызстанда эң төмөн деңгээлдердин бири бойдон калууда. Уй эти орточо 706 сом, кой эти 711 сомду түзөт.
Ошондой эле өлкөдө 2026-жылдын 2-майына чейин уй жана кой этине убактылуу мамлекеттик жөнгө салуу киргизилген.
Күйүүчү майдын баасы да салыштырмалуу төмөн: АИ-92 бензини орточо 75,4 сом, дизель — 80,2 сом.
Адистер белгилегендей, бааларды салыштырууда товарлардын сапаты, көлөмү жана өлчөө бирдиги сыяктуу факторлорду да эске алуу зарыл.
