Ысык-Көлдө таштанды ылгоочу цех ачылды - кубаттуулугу күнүнө 2 тонна
Көлдүн экологиялык абалына, жаратылышына жана жаныбарлар дүйнөсүнө өзгөчө көңүл буруу максатында Жаратылыш ресурстар министрлиги Ысык-Көл облусунда калдыктарды өз-өзүнчө чогултуу боюнча цех ачты. Бул тууралуу министрликтин маалымат кызматы билдирди.
Таштанды ылгоочу линия Жети-Өгүз районунун Саруу айылында жайгашкан жана иштеп жатат. Бул ылгоочу линияны ишке киргизүүнүн маанилүү багыты көлдүн жанындагы кыштактардан жана эс алуу зоналарынан таштандыларды чыгаруу болуп саналат.
“Калдыктарды өз-өзүнчө чогултуу жана кайра иштетүү, аларды пайдалуу продуктыларга айландыруу экологиялык абалды жакшыртууга кызмат кылат, бул долбоорду ишке ашыруунун маңызы болуп саналат. Ошондой эле жергиликтүү тургундар жумуш орундары менен камсыз болушту. Сорттоочу линиянын кубаттуулугу күнүнө 2 тонна“, – дейт министрлик.
Сорттоочу линия төмөнкү жабдууларды камтыйт: полимер жуугуч линиясы, гранулдаштыруу линиясы, агломератор, 400 кВт ток трансформатору, тегерек, калың дубалдуу полиэтилен түтүктөрүн майдалоо үчүн майдалоочу завод.
“Чийки затты жуу алгач кургак ыкма менен жүргүзүлөт, андан ары аба агымы менен нымдуу чөйрөгө өтөт, андан кийин кургатуу, сыгуу системасына жана сактоочу бункерге өтөт”, – деп айтылат билдирүүдө.
Белгилей кетсек, 2023-жылы Жаратылыш ресурстар министрлиги Ысык-Көл облусунун түндүк бөлүгүндө дагы бир нече сорттоочу линияларды ишке киргизүүнү убада кылууда.
