Балык чарбаларында ветеринардык жана биологиялык талаптар текшерилди
4-7-ноябрда мамлекеттик токой фондуна таандык Токмок дарыясынын куймасында жайгашкан балык чарба субъекттеринде пландык мониторинг өткөрүлдү. Бул тууралуу Айыл чарба министрлигинен билдиришти.
Иш-чара Балык өнөр жайы комплекси департаменти, Ветеринардык жана фитосанитардык көзөмөл кызматы, ошондой эле Ветеринария, мал чарбачылыгын өнүктүрүү, жайыт жана тоют кызматынын адистери тарабынан уюштурулду.
Мониторингдин алкагында балык чарбалардын ишмердүүлүгү бааланып, ветеринардык-санитардык жана биологиялык талаптардын сакталышы текшерилди. Ошондой эле суу объекттеринин гидрохимиялык көрсөткүчтөрү өлчөнүп, алынган маалыматтар талданды.
Бул иш-чаранын негизги максаты — балык чарба объекттеринде экологиялык коопсуздукту камсыздоо, балык продукциясынын сапатын көзөмөлдөө жана суу ресурстарынын биологиялык балансынын сакталышын камсыз кылуу.
Мониторингдин жыйынтыгында тиешелүү сунуштар берилди жана балык чарбаларга талаптарды сактоону камсыздоо боюнча түшүндүрүү иштери жүргүзүлдү.
