Акылбек Жапаров: Ош шаарында таза ичүүчү суунун жоктугу - нонсенс
Минкабдын жетекчиси Акылбек Жапаров Ош шаарынын 2022-жылкы социалдык-экономикалык көрсөткүчтөрүнүн жыйынтыгы, ошондой эле үстүбүздөгү жылга пландары каралган кеңейтилген коллегияга катышып, Ош шаарынын бир канча көйгөйлөрүнө токтолду.
Жапаров Ош шаарынын алдында маанилүү милдеттер тургандыгын билдирип, түштүктөгү борбордун үч негизги көйгөйлүү маселесине токтолду:
- калкты ичүүчү таза суу менен камсыздоо
- тыгындардын пайда болушуна алып келген транспорттук айрылыш жолдордун жоктугу
- шаардын бюджетин пландаштыруу маселелери, бул өнүгүүнүн негизги багыттарынын приоритеттеринин жоктугуна алып келет.
«Бишкек жана Ош шаарлары экономиканы өнүктүрүүнүн локомотивдери болуп, артта калбашы керек. Алар башка облустар жана шаарлар үчүн стимул болушу керек. Тилекке каршы, иш жүзүндө биз такыр башка көрүнүшкө ээ болуп жатабыз.
Көп жылдардан бери шаар тургундарын ичүүчү таза суу менен камсыздоо маселеси чечилбей келет. Азыркы учурда анын жоктугу — нонсенс. Бул адамдын негизги муктаждыгы. Чара көрүп, бул маселени чечүү керек. Биз бул жаатта жардам берүүгө даярбыз», — деди ал.
