Зардалыда кичи футбол аянтчасы курулууда
Баткен облусунун Зардалы айылында кичи футбол аянтчасы курулууда. Бул тууралуу облустагы өкүлчүлүктөн билдиришти.
Маалыматка ылайык, облус башчысы Мамыржан Рахимов айылдын социалдык жана инфраструктуралык абалы менен таанышып, президент Садыр Жапаровдун фондунун эсебинен салынып жаткан спорт аянтчасын көрүп чыкты.
Белгилей кетсек, 2024-жылдын 29-сентябрында мамлекет башчысы Зардалы айылына барган учурда жергиликтүү тургундар менен жолугушууда бир катар маселелерди көтөрүп, тиешелүү тапшырмаларды берген.
Анын негизинде айылга электр жарыгы тартылып, мобилдик байланыш жана интернет жеткирилди. Ошондой эле Сары-Талаа – Кызыл-Таш – Зардалы автожолу пайдаланууга берилип, жол 26 чакырымга кыскарды.
Мындан тышкары, Кожешкен дарыясы аркылуу узундугу 30 метр болгон темир көпүрө курулуп, автоунаа каттамы камсыздалды.
Зардалы айылы Баткен районунун борборунан 110 чакырым алыстыкта жайгашкан. Буга чейин айылда электр жарыгы жана байланыш жок болуп, тургундар жол кыйындыктарын тартып келишкен.
