СӨПтө курулуш компанияларынын жетекчилери чогулуп, комитет түзүштү
Соода-өнөр жай палатасында Кыргызстандын ири курулуш компанияларынын өкүлдөрү менен жолугушуу өткөнүн СӨПтүн жетекчиси Темир Сариев билдирди.
Жолугушууда Түркиядагы жер титирөө бүткүл дүйнөлүк коомчулукту ойлонтконун, бул кайгылуу окуя Кыргызстанда турак жайларды курууда кандай материалдар колдонулат деген сыяктуу маселелер айтылган.
“Курулуш бизнеси ишкердик чөйрөсүндөгү флагмандардын бири болуп саналат жана бүгүнкү күндө анын үлүшү ИДПнын 17%на жетти. Бул абдан жакшы көрсөткүч, бирок өсө турган дагы көп жерлер бар, ал үчүн мыйзам чегинде бирге тоскоолдуктарды жоюу зарыл”, – деди Сариев.
Жолугушуунун жыйынтыгында Соода-өнөр жай палатасынын алдында курулуш боюнча Комитет түзүү чечими кабыл алынган.
“Талкуудан кийин комитеттин төрагалыгына “Эмарк групп” курулуш компаниясынын директору Чолпонбек Акматовду дайындоо чечими кабыл алынып, ал кесиптештерин курулуш тармагынын кызыкчылыктарын коргоо үчүн бардык күч-аракеттерин жумшай тургандыгына ишендирди”, – деп айтылат билдирүүдө.
