«Санариптик көчмөн» программасы менен Кыргызстанга 1 миңден ашуун IT адистери жана бизнесмендер келди
Өткөн жылдын сентябрынан бери 1049 адам “Санариптик көчмөн” макамын алган. Бул тууралуу Экономика жана коммерция министринин орун басары Айнура Үсөнбекова ведомствонун 2022-жылдын жыйынтыгы боюнча коллегиясындагы баяндамасында билдирди.
Анын айтымында, мындай статуска ээ болгон 22 адам Ишкерлерди тейлөө борборунда жеке ишкер катары каттоодон өткөн.
Жалпысынан 2022-жылдын 29-сентябрынан 2023-жылдын 10-февралына чейин санариптик көчмөн статусуна 2799 арыз түшкөн. Алардан:
- «Санариптик көчмөн» статусу 1049 адамга берилди
- 1528 талапкерге берилген эмес
- 207 арыз жокко чыгарылды – туура эмес маалыматтардан же кайра тапшыргандыктан
- 12 арыз УКМК тарабынан каралууда
- Дагы эки адам УКМКдан тастыктоону күтүп жатат
- Бир адам Эмгек, социалдык коргоо жана миграция министрлиги тарабынан арызынын каралышын күтүп жатат.
Эске салсак, өлкөгө IT тармагынын адистерин тартуу үчүн “Санариптик көчмөн” (Digital nomad) статусун берүү онлайн порталы ишке киргизилген. Ал ЕАЭБ өлкөлөрүнүн, ошондой эле Азербайжан менен Молдованын жарандарына берилет. Бул макам ал өлкөлөрдүн жарандарына Кыргызстанда жүргөн жеринде каттоосуз жана иштөөгө уруксаты жок жүрүүгө мүмкүндүк берет. Статустун аркасында автоматтык түрдө жеке идентификациялык номерди (ПИН) жана башка көптөгөн нерселерди алууга болот.
«Санариптик көчмөн» статусун кантип алууга болот жана ал кандай артыкчылыктарды берет?
