Япониялык JETRO Кыргызстан менен кызматташууга кызыкдар
Минкаб төрагасы Акылбек Жапаров Япониянын тышкы соода уюму (Japan External Trade Organization, JETRO) менен жолукту. Бул тууралуу минкабдын маалымат кызматы билдирди.
Жолугушуунун жүрүшүндө тараптар өз ара кызыкчылык туудурган бардык багыттар боюнча эки тараптуу кызматташуунун маселелерин талкуулашты.
«КР инвестициялык климатты жакшыртуу боюнча реалдуу практикалык кадамдар жасалууда. Жакында болуп өткөн Борбордук Азия IT-форуму географиялык масштабы жагынан, жетишкендиктердин мааниси жана IT-тармагындагы кызматташуу үчүн көтөрүлгөн темалар боюнча дагы маанилүү болуп калды. Биздин эшигибиз ички жана тышкы инвесторлор үчүн ачык», – деди Жапаров.
Өз кезегинде JETRO компаниясынын департаментинин директору Томохиро Цутия белгилегендей, 2022-жылдын 28-30-ноябрында Японияга болгон жумуш сапарынын алкагында минкаб төрагасы менен болгон жолугушуудан кийин, КР инвестициялык мүмкүнчүлүктөрү япон компанияларына сунушталган.
«Япон компанияларынын КР болгон кызыгуусу өсүүдө. Эми бул кызыкчылыкты эки тарапты тең кызыктырган конкреттүү сунуштар менен толтуруу керек», – деп жыйынтыктады Цутия.
