ЖК Транспорт, коммуникациялар, архитектура жана курулуш боюнча комитетинин кезектеги жыйынында Коомчулукту өнүктүрүү жана инвестициялоо агенттигинин (АРИС) ишмердиги талкууланды. Бул тууралуу ЖК маалымат кызматы билдирди.

Талкууда АРИСтин социалдык объекттилерди куруу жана калыбына келтирүү, ошондой эле калкты ичүүчү таза суу менен камсыздоо боюнча жүргүзүп жаткан ишмердүүлүгү  ортого салынды.

Каралган маселе боюнча аталган агенттиктин аткаруу директору Марс Наспеков маалымат берип, 2010-жылдан 2023-жылдын февралына чейинки мезгилде бүткөрүлгөн жана ишке ашырылып жаткан долбоорлору боюнча баяндама жасады.

Анын айтымында, көрсөтүлгөн мөөнөттө 29 долбоор каралып, анын ичинен 17 долбоор бүткөрүлгөн. Ал эми 12 долбоор ишке ашыруу стадиясында турат. Андан тышкары, 26 долбоордун алкагында 8 906 чакан долбоор ишке ашырылууда. Алардын ичинен 8 273 (92.8%) чакан долбоор бүткөрүлүп, 633 (7.2%) кичи долбоор боюнча тийиштүү иштер жүрүүдө. Жалпысынан ишке ашырылып жаткан долбоорлорлордун суммасы 358 миллион сомду түзөт.

Жыйынтыгында комитеттин мүчөлөрү тарабынан АРИСтин ишин жакшыртуу боюнча сын-пикирлер жана сунуштар айтылды.