"Кыргызкөмүр" келерки күз-кыш мезгилине даярдык көрө баштады

Кыргызстанда өткөн жылы беш көмүр кен жайы ачылды — 2024-жылы 3 көмүр кен жайы гана болгон. Бул тууралуу "Биринчи радио" эфиринде "Кыргызкөмүр" мамлекеттик ишканасынын башкы директорунун орун басары Рустам Садыралиев билдирди.

Анын айтымында, көмүр казууга болжол менен 30 лицензия берилген. Рустам Садыралиев бул уруксат берүүчү документтер Министрлер кабинетинин чечими менен берилерин эске салды.

Баткен облусунда Сүлүктү (11-талаа) жана Бешбурхан, Жалал-Абад облусунда Маркай, Нарын облусунда Торугарт, Ош облусунда Кожо-Көлөң кен жайлары ачылган. Бул участоктордон алынган көмүр адистер тарабынан сапаттуу деп бааланууда.

Бул беш кен жайдагы көмүрдүн жалпы запасы болжол менен 133 млн тоннаны түзөт деп маалымдады "Кыргызкөмүрдүн" өкүлү.

Ал ошондой эле 2026–2027-жылдардын күз-кыш мезгилине даярдык иштери азыртан башталганын кошумчалады.