Тору-Айгырда кубаттуулугу 300 МВт күн электр станциясы курулат
Ысык-Көл районунун Тору-Айгыр айылында кубаттуулугу 300 МВт күн электр станциясы курулат. Бул тууралуу минкаб билдирди.
Министрлер кабинетинин башчысы Акылбек Жапаров энергиянын кайра жаралуучу булактарын (ЭКБ) пайдаланууда Кыргыз Республикасынын потенциалы жеткиликтүү деңгээлде ишке ашырылбаганын белгиледи.
«Биздин мүмкүнчүлүктөрүбүзгө карабастан, биз күн жана геотермалдык энергияны, шамал энергиясын жана биогаз технологияларын толук пайдаланбай жатабыз. Энергиянын кайра жаралуучу булактарынын жаңы технологиялары — энергиянын ишенимдүү, туруктуу жана заманбап булагы болуп саналат. Бул керектөөчүлөр үчүн арзан, эң негизгиси айлана-чөйрөгө жана адамдын ден соолугуна зыяны жок. Энергиянын кайра жаралуучу булактарын өнүктүрүү – бул биздин өлкөнүн энергетика тармагынын келечеги», — деди Жапаров.
Долбоорду кыргызстандык «Бишкек Солар» жана орусиялык «Юнигрин энерджи» компаниялары ишке ашырат. Инвестициянын көлөмү $300 млн түзөт, электростанциянын курулушу жана эксплуатацияланышы менен 500дөн ашуун жумуш оруну түзүлөт.
