Жаңы түзүлүп жаткан Креативдүү индустриялар паркынын (КИП) резиденттери үч салыктын ордуна бир бирдиктүү салык төлөшөт. Социалдык төгүмдөр да бир топ жеңилдетилген. Бул тууралуу 12-апрелде экономика министринин орун басары Чыңгыз Макешов инновациялык саясат боюнча төрт жылдык программаны жыйынтыктоо жана Креативдүү индустриялар паркын ишке киргизүү аземинде билдирди.

Анын айтымында, салык салууда чакан жана орто бизнестин бирдиктүү салыкты төлөө механизми негиз катары алынган. Парктын катышуучулары 10% киреше салыгы, 12% КНС жана 2%га чейин жеткен сатуудан салыктын ордуна квартал сайын түшкөн пайдага гана бир салык төлөшөт.

Түшкөн киреше боюнча бул салык 2023-жылы 0.5%, 2024-жылдан 2026-жылга чейинки мезгилде 1%, 2027-жылы гана ставка 2%га чейин көтөрүлөт.

«Бул салык ставкаларынын абдан олуттуу төмөндөшү», — деди чиновник.

Камсыздандыруу төгүмдөрүн чогултуунун атайын режими жөнүндө да мыйзам долбоору иштелип чыгып, каралууда, ага Жогорку технологиялар паркынын (ЖТП) эрежелери негиз болгон. Макешовдун айтымында, учурда Кыргызстанда киреше салыгы жана социалдык чегерүүлөр менен чогуу алганда, төгүмдөрдүн орто эсеби 37%ды түзөт. Ошондуктан Креативдүү индустрия паркында киреше салыгын бир топ кыскартуу пландалууда.

«Креативдүү индустрия сөзсүз түрдө экономиканын формалдуу эмес секторунун көлөкөсүнөн чыгып, кошумча жумуш орундарын түзүүгө, ошондой эле республикалык бюджетке түшүүчү салыктык түшүүлөрдүн көлөмүн көбөйтүүгө түрткү болот», — деп белгиледи экономика министринин орун басары.