Эркечтамда жүк ташуучу унаалардан мыйзамсыз акча чогултуу аныкталды
«Эркечтам-унаа жол» көзөмөл-өткөрүү пунктунда мыйзамсыз акча чогултуу аныкталды. Бул тууралуу УКМК билдирди.
Маалыматка ылайык, жүктөрдү тоскоолдуксуз жана кезексиз ташып өтүү үчүн чек ара кызматынын жооптуу кызматкерлери менен эки ишкана жең учунан сүйлөшүп алып, системалуу түрдө оор жүк ташуучу унаалардын айдоочуларынан мыйзамсыз акча чогултуу менен алектенген.
«Жогоруда аталган схема атайын ишкерлерди түзүүдөн турган, алардын негизги иши “Д” ЖЧКсы менен “А” АКга автотранспорт каражатынын ар бир айдоочусунан кезекке туруу үчүн 1000 сом өлчөмүндөгү акча каражаттарын мажбурлап өндүрүү болгон, ага ылайык айдоочуларга «Эркечтам» көзөмөл-өткөрүү пункту аркылуу жүк ташуу иштерин жүргүзүүгө уруксат берилген жана контейнерлерди жана жабдууларды кайра жүктөө үчүн крандарды колдонуу $100 түзгөн», - беп мекеме белгиледи.
Коррупциялык схеманы жоюу боюнча көрүлгөн чаралар жүк ташууну көбөйтүүгө, жүк ташуу наркын төмөндөтүүгө жана жогоруда аталган субъекттер тарабынан жасалма түрдө түзүлгөн монополиялык шарттарды жоюуга мүмкүндүк берди. Салыктык текшерүүлөрдүн жыйынтыгында мамлекетке 14 млн сом өлчөмүндөгү зыяндын орду толтурулду. Чек ара кызматкерлерине карата тергөө иштери уланууда.
