КР Германияга 15 млн евро карызын конверсиялагандыгы үчүн ыраазычык билдирип, калган карызды жашыл экономикага салууну сунуштады
Кечээ, 24-августта Берлинге болгон сапарынын алкагында КР Тышкы иштер министри Жээнбек Кулубаев Германиянын Федералдык канцлеринин ведомствосунун Тышкы саясат жана коопсуздук тобунун жетекчиси, Тышкы саясат башкармалыгынын башчысынын орун басары Кристиан Аульбах менен жолугушту. Бул тууралуу ТИМдин маалымат кызматы билдирди.
Баарлашуунун жүрүшүндө Кулубаев кыргыз-герман диалогунун потенциалдуу багыттары, тактап айтканда, биргелешкен инвестициялык долбоорлорду ишке ашыруу, анын ичинде энергиянын кайра жаралуучу булактары чөйрөсүндө, транспорт, логистика жана башка тармактарда өз ара аракеттенүү жөнүндө айтып берген.
"Кулубаев 2022-жылы Кыргызстандын 14.9 млн евро өлчөмүндөгү карызын конверсиялоо чечими үчүн Федералдык Өкмөткө ыраазычылык билдирип, калган карызды жашыл экономиканын долбоорлоруна алмаштыруу мүмкүнчүлүгүн карап чыгууну сунуштады", - деп билдирди министрликтен.
Германия-Борбордук Азия контекстиндеги кызматташтыкты, Кыргызстандын аймактык кызматташтыгын, ошондой эле эл аралык күн тартибиндеги актуалдуу маселелерди талкуулоого өзгөчө көңүл бурулду.
Назира Абдиева
Назира Абдиева
