Кытайдын бир топ жылга стратегиялык планы бар жана аны кыйшаюусуз аткара турган башкаруу механизми иштейт — Улукман Мамытов
Кытайдын багыты аныкталган, бир топ жылга мерчемделген стратегиялык планы бар жана аны кыйшаюусуз аткара турган башкаруу механизми иштейт. Ал эми Кыргызстанда ачык экономикалык рынок. Ошондуктан ким менен алака түзүп жатканыбызды эске алып, өкмөт олуттуу стратегиялык иш пландарды буга чейин иштеп чыгышы зарыл болчу.
Мындай пикирин экономист Улукман Мамытов "Спутник" радиосуна берген маегинде билдирди. Анын айтымында Синьцзян-Уягур автономиялуу району соңку жылдары Кытай үчүн стратегиялык аймакка айланып баратат. Өлкөнүн чыгышынан ушул тарапка келип отурукташкан ири компаниялар да көбөйүүдө. Мунун баары Кытайдын стратегиялык пландарына кирет.
"Анткени учурда жүрүп жаткан геосаясий абалдан улам АКШ деңиз жолун бөгөп койсо Кытай Батышка товарларын Кыргызстан, Казакстан жана Россия аркылуу жеткирет. Бул үчүн алар чоң-чоң инвестицияларды жумшоого даярдыгын ачыкташты. Бирок калк арасында Кытай менен алака түзүүдө чочулоо бар. Ал да жөндүү десек болот. Анткени Кытайдын багыты аныкталаган, бир топ жылга мерчемделген стратегиялык планы бар жана аны кыйшаюусуз аткара турган башкаруу механизми иштейт. Ал эми бизде ачык экономикалык рынок. Ошондуктан ким менен алака түзүп жатканыбызды эске алып, өкмөт олуттуу стратегиялык иш пландарды буга чейин иштеп чыгышы зарыл болчу", - дейт ал.
Ошондой эле экономист кыргызстандыктар мындай стратегиялык концепцияларды көрбөгөндүктөн бир аз кооптонуу болуп жатканын айтат.
"Бирок коркуп отура бербей мүмкүнчүлүктөрдөн пайдаланып калышыбыз абзел. Кыргызстан бир эле транзиттик мамлекет эмес, Кытайдын товарларын бизден чыгара турган ири өндүрүштүк ишканаларды куруп, аны иштетүүдө өзүбүздүн адистерди окутуп, үйрөтүүгө кошо жетишишибиз керек", — деди Мамытов.
Ишкер Media
Назира Абдиева
Ишкер Media
