Кыргызстан менен Пакистандын логистикалык кызматташтыгы талкууланды
16-июнда Экономика жана коммерция министри Бакыт Сыдыков Кыргызстандагы Пакистандын атайын жана ыйгарым укуктуу элчиси Алтамаш Вазир Хан менен жолугушуп, транспорттук-логистикалык кызматташтыкты өнүктүрүү маселелерин талкуулады.
Экономика жана коммерция министрлигинин басма соз кызматынын маалыматына ылайык, жолугушууда тараптар 2025-жылдын 3–4-декабрында президент Садыр Жапаровдун Пакистан Ислам Республикасына болгон мамлекеттик сапарынын жыйынтыгында жетишилген макулдашууларды ишке ашыруу маселелерин карашты.
Ошондой эле кол коюлган эки тараптуу келишимдерди жана меморандумдарды жүзөгө ашыруу боюнча иштер талкууланды.
Мындан тышкары, эки өлкөнүн соода-экономикалык кызматташтыгынын учурдагы абалы жана өнүгүү келечеги боюнча пикир алмашуу болду. Өзгөчө көңүл өз ара соода жүгүртүүнү көбөйтүү, экспорттук-импорттук операцияларды кеңейтүү жана эки тараптуу экономикалык дараметин натыйжалуу пайдалануу маселелерине бурулду.
Транспорттук-логистикалык багытта Пакистандын деңиз портторун Кыргызстандын экспорттук мүмкүнчүлүктөрүн кеңейтүү үчүн пайдалануу, ошондой эле транзиттик жүк ташууларды өнүктүрүү маселелери талкууланды.
Жолугушуунун жыйынтыгында тараптар кыргыз-пакистан мамилелерин мындан ары чыңдоого жана соода-экономикалык кызматташтыкты кеңейтүүгө кызыкдар экендиктерин билдиришти.
