Элдик курултайдын делегаттары Жерүй кенинин иши менен таанышты
Талас облусунан дайындалган III Элдик курултайдын делегаттары 2024-жылдын 17-декабрь күнү Жерүй кенин иштетип жаткан «Альянс Алтын» компаниясынын ишмердүүлүгү менен таанышышты. Бул тууралуу ишкананын маалымат кызматы билдирди.
Маалыматка ылайык, иш-чаранын жүрүшүндө компания делегаттарды Талас алтын кен комбинатынын иштөө процесси, калдык сактоочу жайдын абалы менен тааныштырышты.
Андан сырткары тегерек стол уюштурулуп делегаттар тарабынан берилген ар кыл суроолорго компаниянын кызматкерлери тарабынан жооптор берилди.
III Элдик курултайдын делегаттары ишкананын ишмердүүлүгу тууралуу өздөрү кызыккан бир топ суроого тиешелүү жоопторду алышканын айтып, сунуштарын дагы кошумчалашты.
«Бүгүн биз компаниянын ишмердүүлүгү менен таанышып чыктык. Мындай ишкана, фабрикалар иштебесе өлкөбүздө өнүгүү болбойт деп ойлойм. Андыктан Талас облусубузда дагы көптөгөн ишканалар ачылышы керек. Мен өзүм ушул кенге жакын жайгашкан айыл аймактан болом. Жерүй кени иштегенден тартып, которулган салыктык каражаттардын эсебинен айылыбыздын социалдык-экономикалык абалы жакшырууда. Мисалга алсак, айылдарыбыздын жолдоруна асфальт төшөлүп, бала бакча, мектептерибиз толук кандуу оңдоодон өтүп жана башка бир катар көйгөйлүү маселелерибиз чечилүудө», - деди Талас районунун Кеңеш айылынан шайланган делегат Айсулуу Байкеева.
Жолугушуу учурунда «Альянс Алтын» компаниясы тарабынан негизделген «Альянс Алтын» өнүктүрүү фондунун ишмердүулүгү тууралуу делегаттарга фонддун директору Батырбек Качкымбаев маалымат берди.
«Альянс Алтын» ишканасы иштеп баштагандан тартып өлкө казынасына 23 миллиард сомдон ашуун каражат которгон. Кендин аймагында 1500ге жакын кызматкер эмгектенет.
