КРнын инвестициялык климатын жакшыртуу маселеси Вашингтондо талкууланды
КРнын финансы министри Алмаз Бакетаев Вашингтонто болгон иш сапарынын алкагында Эл аралык финансы корпорациясынын Жакынкы Чыгыш, Борбордук Азия, Түркия, Ооганстан жана Пакистан боюнча вице-президенти Риккардо Пулити менен жолугушту. Бул тууралуу Финансы министрлигинин басма сөз кызматынан маалымдашты.
Маалыматка ылайык, жолугушууда экономиканын жеке секторун өнүктүрүү боюнча кызматташтыктын негизги багыттары, Эл аралык финансы корпорациясынын стратегиялык долбоорлорду каржылоого катышуусу, чет элдик инвесторлорду тартуу, мамлекеттик-жеке өнөктөштүктү өнүктүрүү талкууланды.
Финансы министрлиги Эл аралык финансы корпорациясынын чийки затка байланышпаган экономика тармактарына, анын ичинде агроөнөр жай комплекси, кайра жаралуучу энергетика, чакан гидроэлектростанциялар жана күн станциялары, ошондой эле транспорт жана шаардык логистика тармагындагы долбоорлорго кызыкдар экенин билдирди.
Жолугушуунун жыйынтыгында тараптар мындан аркы конструктивдүү кызматташууга, стратегиялык долбоорлорду ишке ашырууга жана КРнын инвестициялык жагымдуулугун бекемдөөгө даяр экендиктерин ырасташты.
