Рено Винье чакан ишканалардын мүмкүнчүлүгү чоң экенин билдирди
2017-жылдан тарта Швейцария өкмөтү Кыргызстан, Өзбекстан жана Тажикстанга чакан бизнести колдоо демилгесинин алкагында 12 миллиондон ашык евро бөлгөнүн Швейцариянын Кыргызстандагы элчилигинин экономикалык өнүгүү багытынын жетекчиси Рено Винье “Борбор Азиядагы жана Монголиядагы чакан, орто бизнести колдоо” конференциясында билдирди.
Анын айтымында, Швейцарияда компаниялардын 99 пайызы чакан жана орто ишканалар жана ошолор өлкө экономикасын атаандаштыкка туруктуу кылат.
“Бизге конференциянын “Чакан жана орто ишканаларды өстүрөбүз – көп жана күчтүү” деген темасы жагып жатат. Бирок, швейцариялык көз караш менен алганда “көп” деген дайыма эле негизги боло бербейт. Эң негизгиси ишканалар ийкемдүү жана акылдуу болуш керек. Кээ бир учурда чакан ишканалар деле ийгиликтүү боло алат”,-дейт Рено Винье.
Буга улай ал көптөгөн майда ишканалардын аракеттеринин биригүүсү, идеяларды алмашуу жана бирдиктүү аракеттер жакшы жыйынтыктарга жеткирерин кошумчалады.
