Фитосанитардык сертификатта дарек туура эмес болсо, чектөө колдонулат
Өсүмдүктөрдү химиялаштыруу, коргоо жана карантини департаментинин аймактык башкармалыктарында тышкы экономикалык иштин катышуучулары менен жолугушуулар өтүүдө. Бул тууралуу Айыл чарба министрлигинен билдиришти.
Аталган департамент фитосанитардык талаптарды так сактоо максатында өлкөнүн бардык аймактарында түшүндүрүү иштерин жүргүзүп жатат. Иш-чаралардын негизги максаты — экспорттолгон жүктөр боюнча бара турган өлкөдөгү жүк алуучулардын даректерин фитосанитардык сертификаттарда туура жана так көрсөтүүнүн зарылдыгын эскертүү. Бул талаптардын бузулушу эл аралык соодадагы көйгөйлөргө алып келиши мүмкүн.
Белгиленгендей, эгер экспорттоочу фитосанитардык сертификатта жүк алуучунун дарегин атайылап туура эмес көрсөтсө жана мындай фактылар жүк баруучу мамлекеттин өсүмдүктөрдүн карантини боюнча ыйгарым укуктуу органы тарабынан бир жыл ичинде эки жолу расмий билдирилсе, анда жөнөтүүчүгө фитосанитардык сертификат берүүдөн баш тартылат.
Мындай чектөө чарасы 60 календардык күнгө чейин колдонулат.
Департамент тышкы экономикалык иштин катышуучуларын фитосанитардык талаптарды так сактоого жана экспорттук документтерди туура тариздөөгө чакырат.
