Кыргызстанда 9 айда 4843 бала турмуштук оор кырдаалга кабылган
Кыргызстанда турмуштук оор кырдаалга туш болгон балдарды жана үй-бүлөлөрдү аныктоо боюнча иштер улантылууда. Бул ишмердүүлүк 2015-жылдын 22-июнундагы №391 токтом менен бекитилген жобонун негизинде жүргүзүлөт.
Эмгек, социалдык камсыздоо жана миграция министрлигинин маалыматына ылайык, 2025-жылдын 9 айында 4843 бала турмуштук оор кырдаалга кабылганы аныкталган. Алардын ичинен 2514 балага жекече иштөө пландары иштелип чыгып, 2488 бала турмуштук оор кырдаалдан чыгарылган. Министрлиги аныкталган балдардын дээрлик жарымына турмуштук оор кырдаалдан чыгууга жардам берген.
Мындан тышкары, 1277 үй-бүлө жардамга муктаж катары катталган. Алардын ичинен 947 үй-бүлө социалдык колдоо көрсөтүүнүн натыйжасында кризистен чыга алышкан.
Министрлик ошондой эле балдарга карата ырайымсыз мамиленин алдын алууга өзгөчө көңүл бурат. Ушул эле мезгил ичинде турмуштук оор кырдалга кабылган 444 бала ар кандай зомбулуктун түрлөрүнөн жабыркаган. Алардын баарына зарыл болгон социалдык жана психологиялык жардам көрсөтүлгөн.
