Өлкө айыл чарбасын каттоо 2026-жылга жылдырылды
Өлкөнүн айыл чарбасы тууралуу так, сапаттуу маалымат чогултуу максатында Кыргызстан айыл чарбасын каттоо 2026-жылдын март айына жылдырылды.
Эске салсак, буга чейин МинКабдын №122 токтомунун негизинде өлкө аймагында кезектеги айыл чарба каттоосун өткөрүү каралган.
Айыл чарба каттоосу 10 жылда бир жолу өткөрүлөт жана өлкөнүн айыл чарбасынын абалы жана түзүмү жөнүндө толук, объективдүү жана ишенимдүү маалымат алууга багытталган масштабдуу улуттук статистикалык иш-чара болуп саналат. Чогултулган маалыматтар натыйжалуу агрардык саясатты иштеп чыгуу, азык-түлүк коопсуздугун камсыз кылуу жана айыл аймактарын туруктуу өнүктүрүү үчүн негизги курал болуп калат.
Айыл чарбасын каттоо менчиктин бардык түрүндөгү айыл чарба ишканаларынын жана чарбаларынын санын жана түзүмүн, айыл чарба өндүрүшүнүн түрлөрүн жана көлөмүн, малдын жана үй канаттууларынын санын, фермердик чарба жүргүзүүнүн өзгөчөлүктөрүн жана механизация деңгээлин аныктоо боюнча так маалыматтарды алууга шарт түзөт.
Каттоону даярдоо боюнча бардык уюштуруу-методикалык иштер 2024-жылы башталганжана эки райондо пилоттук иш-чаралар өткөрүлгөн.
