"Кыргыз Туусу" маалыматтык-басма үйү" мамлекеттик мекемеси түзүлдү

Кыргызстанда жаңы мамлекеттик медиа бирикме — "Кыргыз Туусу" маалыматтык-басма үйү мамлекеттик мекемеси түзүлүп, тийиштүү чечимге МинКаб төрагасы Адылбек Касымалиев кол койду.

Министрлер Кабинетинин басма сөз кызматы билдиргендей, токтом президенттин "Кыргыз Туусу" маалыматтык-басма үйү" мамлекеттик мекемесин түзүү жөнүндө" жарлыгын ишке ашыруу максатында кабыл алынды. Бул чечим мамлекеттик жалпыга маалымдоо каражаттарын өнүктүрүүгө жана бекемдөөгө багытталган.

Жаңы мекеме төмөнкү уюмдарды бириктирүү жолу менен түзүлдү:

• "Кыргыз Туусу" басма үйү;
• "Слово Кыргызстана" басма үйү;
• "Байчечекей" балдар журналынын редакциясы;
• "Ала-Тоо" адабий-көркөм журналынын редакциясы.

МинКабда белгилешкендей, бирдиктүү маалыматтык-басма үйүн түзүү мамлекеттик медиа тутумун модернизациялоонун, алардын ишмердүүлүгүнүн натыйжалуулугун жогорулатуунун жана өлкөнүн маалымат мейкиндигин бекемдөөнүн маанилүү кадамы болуп саналат.

Кабыл алынган чечимдер мамлекеттик маалымат саясатынын алкагында бирдиктүү редакциялык саясатты жүргүзүү үчүн институционалдык шарттарды түзүүгө, мамлекеттик медианы башкаруу системасын чыңдоого, контентти өндүрүүнүн жана жайылтуунун натыйжалуулугун арттырууга мүмкүндүк берет.

Токтом менен "Кыргыз Туусу" маалыматтык-басма үйү" мамлекеттик мекемеси жөнүндө жобо, штаттык бирдиктердин чектүү саны, кызматкерлер үчүн коэффициенттер жана квалификациялык талаптар бекитилди.