Маркировкасы жок 22 тонна картошка Кыргызстанга киргизилген жок
7-апрелде Чүй-Бишкек аймактык башкармалыгына караштуу “Ак-тилек автожолу” фитосанитардык текшерүү постунда Казакстан Республикасынан импорттолуп келген 22 тонна картошка продукциясы текшерүүдөн өткөрүлдү. Бул тууралуу Айыл чарба министрлигинен билдиришти.
Фитосанитардык көзөмөлдүн жүрүшүндө продукциянын таңгагында талапка ылайык маркировкасы жок экендиги аныкталды.
Евразия экономикалык комиссиясынын Кеңешинин 2016-жылдын 30-ноябрындагы №157 чечимине ылайык, карантинге алынган продукциянын ар бир таңгагында төмөнкү маалыматтар милдеттүү түрдө көрсөтүлүшү керек:
- продукциянын аталышы
- чыгарылган өлкө
- экспорттоочу өлкө жана/же реэкспортер өлкө
Белгиленген талаптардын бузулушуна байланыштуу, аталган жүк Евразия экономикалык биримдигинин бирдиктүү карантиндик фитосанитардык талаптарына жооп бербейт деп табылып, импорттоочу өлкөгө кайра кайтарылды.
Тиешелүү органдар мындай учурлар фитосанитардык коопсуздукту камсыздоо жана карантиндик зыянкечтердин жайылышын алдын алуу максатында катуу көзөмөлдөнөрүн эскертишет.
