Кыргызстан–Сауд Арабия: Мамлекеттик мектептерди куруу макулдашылды
Курулуш, архитектура жана турак жай-коммуналдык чарба министри Нурдан Орунтаев “Мамлекеттик мектептерди куруу (2-фаза)” долбоорунун алкагында Эр-Рияд шаарына иш сапары менен барды. Бул тууралуу ведомстводон билдиришти.
18-февралда өткөн жолугушууга Кыргыз Республикасынын Сауд Арабиясы Королдугундагы Элчиси Улугбек Марипов, Сауд өнүктүрүү фондунун башкы директору Аль Маршад, ошондой эле министр баштаган делегация катышты.
Жолугушуунун жүрүшүндө тараптар расмий сүйлөшүүлөрдү өткөрүп, долбоордун техникалык тапшырмасы бекитилди. Ошондой эле Кыргызстандын аймактарында курула турган мамлекеттик мектептердин тизмеси каралып, кызматтардын сапаты, заманбап билим берүү инфраструктурасын түзүү жана этап-этабы менен ишке ашыруу маселелери талкууланды.
Долбоордун кийинки фазасын ишке ашыруу үчүн кошумча инвестицияларды жана финансылык каражаттарды тартуу мүмкүнчүлүктөрү да каралды. Тараптар билим берүү инфраструктурасын өнүктүрүүдө эки тараптуу өнөктөштүктү бекемдөөгө даяр экендиктерин билдиришти.
Белгилей кетсек, долбоор алкагында буга чейин 50 млн АКШ доллары (187,5 млн сауд риалы) көлөмүндө келишим түзүлгөн. Анын негизинде:
- Бишкек шаарында 5 жаңы мектеп жана 7 кошумча окуу корпусу курулат;
- Чүй облусунда 2 жаңы мектеп курулат;
- Объекттердин сыйымдуулугу 150дөн 1000 окуучу орунга чейин ылайыкташтырылат.
Долбоорду 2026-жылдан 2029-жылга чейин толук ишке ашыруу пландалууда.
