Кыргызстанда жеке маалыматтарды 27 миңден ашык уюм иштетет
Кыргызстанда жеке маалыматтар массивинин кармоочуларынын реестринде 27 652 уюм катталган. Бул тууралуу Жеке маалыматтарды коргоо боюнча мамлекеттик агенттиктин директору Кутман Мамыров Илим, билим берүү, инновациялык өнүгүү жана маалыматтык технологиялар, маданият, спорт жана жаштар иштери боюнча Жогорку Кеңештин комитетинин жыйынында билдирди.
Анын айтымында, алардын ичинен 2 906сы — мамлекеттик уюмдар, ал эми 24 748и — жеке менчик уюмдар.
Мамыров белгилегендей, санариптик долбоорлордун алкагында агенттик 2022-жылы жеке маалыматтар массивинин кармоочуларынын реестрин түзгөн. 2023-жылы купуялык саясатын түзүүчү конструктор ишке киргизилип, аны 32 969 уюм колдонгон.
2024-жылы өзүн-өзү баалоо модулу пайда болуп, аны электрондук түрдө 11 081 уюм пайдаланган. Ошондой эле 2024-жылы жаңыртылган онлайн-чат аркылуу 2 528 уюм жана жаран кайрылган.
