Кыргызстанда свайлуу фундамент менен биринчи мектеп курулат
Кыргызстанда алгачкы жолу өзгөчө технологияны колдонуу менен мектеп курулуп жатканын Курулуш министрлиги билдирди.
Министрлик Бишкек шаарынын Свердлов районундагы №46 мектепке 450 орундуу кошумча корпус куруп жатат. Долбоор республикалык бюджеттин эсебинен ишке ашырылууда. Башкы планга ылайык, имарат үч кабаттуу болуп, заманбап талаптарга жооп берет.
Курулуш иштеринин жүрүшүндө болжол менен 40 сантиметр тереңдикте жер астындагы суулардын көп келип чыгышы аныкталып, бул курулуш шарттарын кыйла татаалдаштырган. Ушундан улам министрлик свайлуу (жерге бекем орнотулган темир-бетон мамы) фундаментти колдонуу чечимин кабыл алган.
"Биринчи этапта скважиналар бургуланат, андан кийин 9 метрге чейинки тереңдикте жердин тыгыз катмарларына арматура каркасы орнотулуп, бетон куюлат. Мындай негиз свайлуу фундамент деп аталат", — деп түшүндүрүштү министрликтен.
Белгиленгендей, бул технология нымдуу жана туруктуу эмес топурактын ордуна жасалма түрдө бекемделген негиз түзүүгө мүмкүндүк берет. Натыйжада имараттын бекемдиги жана ишенимдүүлүгү кыйла жогорулайт.
