Банк тармагына элдин ишеними артып, банкта акча кармоо өсүп жатат
КРнын банк сектору туруктуулукту көрсөтүп жатат. Банктардын депозиттик базасынын көлөмү 2025-жылы 46,2 %га же 865,9 млрд сомго чейин өсүп, банк системасына болгон калктын ишенимин көрсөтүп, элдин акча топтоо аракетинин күчөшүн чагылдырууда. Мындай маалыматты Улуттук банктан билдиришти.
Улуттук банктын төрагасы Азат Козубековдун айтымында, коммерциялык банктардын кредит портфели 2025-жылы 48,8 пайызга көбөйүп, экономиканын реалдуу секторунун жигердүүлүгүн чагылдыруу менен 507,0 млрд сомду түзгөн.
“Көбүнчө кредиттик тармактар соода-сатык, кызмат көрсөтүү, айыл-чарбасы жана керектөө кредиттери бойдон калууда. Ошондой эле депозиттик портфель да өзүнүн өсүшүн көрсөтүп жатат. 2025-жылдын жыйынтыгы боюнча 879 млрд сомго барабар болду жана анын басымдуу бөлүгү кыргыз сомундагы депозиттер” – деди төраганын орун басары.
Мындан сырткары Улуттук банктын өкүлү эл аралык камдын көлөмү бүгүнкү күндө 10 млрд АКШ долларынын тегерегинде сакталып тургандыгын жана анын көлөмүнүн өсүшү көбүнчө алтындын баасына көз каранды экендигин билдирди. Анын айтымында, бул көрсөткүч Кыргыз Республикасы үчүн эл аралык резервдердин деңгээли боюнча рекорддук болуп саналат.
