М.Тургунбаев: ESG - экология банктык тобокелдикке айланганда
Улуттук банктын төрагасы Мелис Тургунбаев өзүнүн баракчасында “ESG: экология банктык тобокелдикке айланганда” аттуу билдирүүсүн жарыялады. Анда төрага, бир нече жыл мурда ESG негизинен эл аралык конференцияларда угулса, азыр банк тутумунда жана инвестициялык чөйрөдө көбүрөөк талкууланып жатканын билдирип, туруктуу каржылоо убактылуу тенденциябы же жаңы стандартпы?- деген суроону талдоого алды.
Тургунбаевдин айтымында, ESG-бул каржылык чечимдерди кабыл алуунун жаңы ыкмасы. Анын негизинде банктар пайыздык ченди жана күрөөнү гана эмес, долбоордун өзүнүн туруктуулугун - анын экологиялык тобокелдигин, социалдык кесепеттерин жана корпоративдик башкаруунун сапатын баалашат.
“Кыргызстан үчүн бул тема тажрыйбалык мааниге ээ. Климаттын өзгөрүшү экономикага таасирин тийгизип жатат - кургакчылык, жер көчкү жана башка жаратылыш кубулуштары инфраструктурага, айыл чарбасына жана калктын кирешесине таасирин тийгизет. Натыйжада, бул тобокелдиктер акырындык менен каржы системасына өтөт – дейт төрага.
КРУБ төрагасынын баамында экологияда маселе жаралса, энергетикалык компаниялардын туруктуулугу жана банк портфелдеринин сапатына таасир этет. Андыктан, Кыргызстанда туруктуу каржылоонун инфраструктурасы акырындык менен калыптанууда.
«Кайсы долбоорлорду экологиялык деп эсептөөгө болорун аныктаган улуттук “жашыл” таксономия бекитилген. Улуттук банк дагы БУУӨП менен биргеликте иштелип чыккан, ESG принциптерин киргизүү боюнча жол картасын ишке ашырууда. Эмне үчүн дүйнө жүзү боюнча банктар ушул багытта жылып жатышат? Анткени глобалдык капиталдын структурасы өзгөрүүдө” – деп белгиледи М.Тургунбаев.
Мындан сырткары төрага туруктуу каржылоо рыногу триллиондогон долларга бааланып, инвесторлор барган сайын ачыктыкты, отчеттуулукту жана тобокелдиктерди башкаруунун түшүнүктүү стандарттарын талап кылып жатканын билдирди. Айтымында, туруктуу каржылоо модага байланыштуу эмес, ал учурдагы дүйнөлүк каржы рыногундагы стандартка айланууда.
