Талас шаарында Талас университетинин 5 кабаттуу жаңы имараты курулуп жатат
Талас шаарындагы Талас университетинин 5 кабаттуу жаңы имаратынын курулушу активдүү уланып жатканын аталган облустагы өкүлчүлүктөн билдиришти.
Маалыматта белгиленгендей, имарат президент Садыр Жапаровдун колдоосу менен курулуп жатат. Учурда жалпы аянты 5 миң 600 чарчы метрди түзгөн 5 кабаттуу имараттын пайдубалы түптөлүп, экинчи кабатынын курулушу жүрүп жатат. Жаңы кампус бардык заманбап окуу куралдары менен жабдылып, студенттер үчүн ыңгайлуу шарттар түзүлөт.
Имарат 31-августта мамлекет башчысынын катышуусунда ишке берилери пландалууда.
“Өткөн жылы университеттин эмгек жамааты өкүлчүлүккө кайрылып, окуу жайдын имаратын капиталдык оңдоо иштеринен өткөрүп берүү өтүнүчү менен кайрылган. Бул маселеден кабардар болгон мамлекет башчы жаңы 5 кабаттуу имарат куруу боюнча чечим кабыл алып, анын каржылык маселесин да чечип берген”,-деп айтылат маалыматта.
Белгилей кетсек, Талас мамлекеттик университети 1994-жылы түзүлгөн. Ал совет мезгилинен бери иштеп келген Талас педагогикалык окуу жайынын базасында уюштурулган. Ал эми бул педагогикалык окуу жай 1930-жылдары эле өз ишин баштаган. Университеттин билим берүү тарыхы 90 жылдан ашуун убакытты камтыйт.
