Салык кызматы турак эмес мүлк салыгын төлөө мөөнөттөрүн эскертти
Мамлекеттик салык кызматы турак эмес мүлк объектилерине салынуучу салыктын төлөө мөөнөттөрүн эскертип, салык квартал сайын тең үлүштөр менен 20-мартка, 20-июнга, 20-сентябрга жана 20-декабрга чейинтөлөнөрүн билдирди. Бул тууралуу Салык кызматынан билдиришти.
Салык мыйзамдарына ылайык, кыймылсыз мүлккө салынуучу салыкты эсептөө жана эсепке алуу Мамлекеттик салык кызматы тарабынан жүргүзүлөт. Ал эми салык төлөөчүлөр эсептелген сумманы белгиленген мөөнөттөрдө төлөөгө милдеттүү. Кыймылсыз мүлккө эсептелген салыктар тууралуу маалыматтар cabinet.salyk.kg сайтындагы салык төлөөчүнүн жеке кабинетинде жеткиликтүү.
Салык кызматы мүлк салыктарынын туура эсептелиши мамлекеттик каттоо органдарынын маалыматтык системаларындагы маалыматтардын актуалдуулугуна байланыштуу экенин белгилеп, жарандарга мүлккө болгон укук белгилөөчү документтердеги маалыматтарды "Кадастр" мамлекеттик мекемесинин маалыматтары менен салыштырып текшерүүнү сунуштайт.
Мындан тышкары, салык төлөөчүлөргө Салык төлөөчүнүн кабинетинен турак эмес имараттар, жайлар жана курулуштар, калктуу конуштардын жерлери жана айыл чарба багытындагы эмес жерлер боюнча салыктын туура эсептелишин текшерүү сунушталат.
Эгерде салыктын эсептелишинде ката же туура эмес маалыматтар аныкталса, маалыматтарды тактоо үчүн "Кадастр" мамлекеттик мекемесине же объект жайгашкан жер боюнча Салык кызматынын аймактык башкармалыктарына кайрылуу зарыл.
