Улуттук банк 2025-жылдын IV чейрегинде банктарга карата бир катар чара колдонду
Кыргыз Республикасынын Улуттук банкы 2025-жылдын төртүнчү чейрегинде коммерциялык банктардын ишмердүүлүгүн көзөмөлдөө алкагында бир катар эскертүү чараларын жана санкцияларды колдонгон. Бул тууралуу жөнгө салуучу органдын тийиштүү отчетунда маалымдалган.
Берилген маалыматка ылайык, отчеттук мезгилде банктарга карата 1 эскертүү жөнөтүлүп, 1 жазма буйрук берилген. Ошондой эле мыйзам талаптарын бузган учурлар үчүн 1 айыптык төлөм салынган.
Мындан тышкары, Улуттук банктын Көзөмөл боюнча комитети аталган мезгилде 12 отурум өткөрүп, анда коммерциялык банктардын ишине байланыштуу жалпы 30 маселе каралган. Бул маселелер негизинен банк секторундагы туруктуулукту камсыз кылуу, мыйзам талаптарын сактоо жана кардарлардын кызыкчылыктарын коргоо багытында болгон.
Улуттук банк белгилегендей, мындай көзөмөл чаралары банк тутумунун ишенимдүүлүгүн жогорулатууга, финансылык тартипти бекемдөөгө жана мүмкүн болуучу тобокелдиктерди алдын алууга багытталган.
