Кыргызстанда өнөр жайды каржылоо үчүн жаңы мамлекеттик банк түзүү сунушталууда
Кыргызстанда өнөр жай ишканаларын узак мөөнөттүү каржылоого багытталган атайын мамлекеттик банк түзүү сунушу коомдук талкууга коюлду. Экономика министрлиги сунуштаган долбоорго ылайык, өнөр жайды өнүктүрүү банкын мамлекеттин 100 % катышуусу менен ачык акционердик коом түрүндө түзүү каралууда.
Акционердин ыйгарым укуктарын Кыргыз Республикасынын Министрлер кабинети же берилген ыйгарым укуктардын чегинде ал ыйгарым укук берген мамлекеттик орган жүзөгө ашырат.
Мыйзам долбоорунда банк аркылуу өнөр жай ишканаларына төмөнкү финансылык кызматтарды көрсөтүү сунушталууда:
- жаңы өндүрүштөрдү ачуу жана иштеп жаткандарын кеңейтүү үчүн кредит берүү;
- өндүрүштүк жабдууларды, техникаларды жана машиналарды лизингге каржылоо;
- ишкерлерге кепилдиктерди берүү;
- өнөр жай долбоорлорун башка банктар аркылуу каржылоо;
- ири инвестициялык долбоорлорду биргелешип каржылоо.
Мындан тышкары, банк индустриалдык парктарды, өнөр жай кластерлерин, экспортко багытталган жана импортту алмаштыруучу ишканаларды колдоого багытталат.
Жеке жарандарга кредит береби?
Долбоорго ылайык, жаңы банк кадимки коммерциялык банктардан айырмаланат. Ал негизинен өнөр жай тармагындагы долбоорлорду каржылоого адистешет.
Ошол эле учурда долбоордун мамлекеттик программага киргизилиши же мамлекеттик органдын сунуштамасы каржылоо алууга автоматтык түрдө негиз болбойт. Ар бир долбоор өзүнчө экспертизадан өткөрүлөт.
