Кара-Балтадагы экологиялык абал текшерилди
Жогорку Кеңештин экологиялык коопсуздукту иликтөө боюнча убактылуу депутаттык комиссиясы Кара-Балта шаарындагы “Джунда”, “Азия Сталь” жана “СУ-4” ишканаларынын ишмердүүлүгү менен таанышып келишти. бул тууралуу ЖКтин маалымат кызматынан кабарлашты.
Билдирүугө караганда, жергиликтүү тургундардын абанын булганышы боюнча арыздарынан улам “Азия Сталь” заводунун мештери убактылуу токтотулуп, учурда ишкана өндүрүштү модернизациялоо жана чыпкаларды жакшыртуу иштерин жүргүзүлуп жатат.
Көчмө жыйындын жүрүшүндө тургундар экологиялык абал, анын адамдын ден соолугуна тийгизген таасири жана ишканалардын жоопкерчилиги боюнча көйгөйлөрдү көтөрүштү.
Өз кезегинде депутат Бактыбек Чойбеков Кара-Балта шаарындагы экологиялык абалды жакшыртуу жергиликтүү тургундардын эмес, Жаратылыш ресурстары, экология жана техникалык көзөмөл министрлигинин түздөн-түз милдети экенин айтты.
Ал жарандардын саламаттыгы баарынан жогору турушу керектигин баса белгилеп, көйгөйдү ар тараптуу изилдөө жана аны чечүү жолдорун аныктоо максатында депутаттык комиссия тарабынан бир катар отурумдарды жана көчмө жыйындарды өткөрүү зарылдыгына токтолду.
Иш чаранын жыйынтыгында, депутаттык комиссия экологиялык маселелерди мамлекеттик органдар менен биргеликте системалуу чечүү, калктын сунуштарын эске алуу жана мыйзамдык базаны өркүндөтүү зарылдыгын белгиледи.
