Президент контрабандага каршы күрөшүү боюнча жарлыкка кол койду
Президент Садыр Жапаров «Контрабандага жана КРнын аймагына эсепке алынбаган товарларды ташып келүүгө каршы күрөшүү боюнча чаралар жөнүндө» жарлыкка кол койду. Бул тууралуу өлкө башчынын маалымат кызматы кабарлады.
Жарлыктын максаты улуттук экономиканын кызыкчылыктарын коргоого, контрабандага каршы күрөшүүгө багытталган чараларды күчөтүү болуп саналат.
Жарлыктын алкагында министрлер кабинетине тапшырылат:
- Үчүнчү өлкөлөр жана ЕАЭБге мүчө мамлекеттер менен соода жүргүзүүнүн алкагында КРга ташылып келүүчү (импорттолуучу) товарларды (жүктөрдү) толук эсепке алууну камсыз кылсын
- КРнын аймагына контрабандалык жана/же эсепке алынбаган ташылып келген товарларды (жүктөрдү), ошондой эле үчүнчү өлкөлөр жана ЕАЭБге мүчө мамлекеттер менен соода жүргүзүүнүн алкагында товарларды (жүктөрдү) контрабандалык жана/же эсепке алынбаган алып өтүү үчүн пайдаланылган транспорт каражаттарын конфискациялоону (алып коюуну) камсыз кылуу боюнча КРнын мыйзамдарынын алкагында чараларды көрсүн
- Үчүнчү өлкөлөр жана ЕАЭБге мүчө мамлекеттер менен соода жүргүзүүнүн алкагында КРнын аймагына ташылып келүүчү (импорттолуучу) товарларды эсепке алуу боюнча салык жана бажы кызматтарынын маалыматтык системаларынын үзгүлтүксүз иштешин, маалыматтарды онлайн режимде берүүнү, транспорт каражаттарынын мамлекеттик номер белгилерин таануу боюнча автоматташтырылган камералар менен өткөрүү пункттарын жабдууну камсыз кылсын
- Үчүнчү өлкөлөр жана ЕАЭБге мүчө мамлекеттер менен соода жүргүзүүнүн алкагында КРнын аймагына товарларды ташып келүү (импорттоо) боюнча КРнын мыйзамдарынын ченемдерин бузган импортерлордун/ташуучулардын транспорт каражаттары үчүн атайын токтоочу жайларды киргизсин
- ЕАЭБге мүчө мамлекеттердин аймагынан КРнын Мамлекеттик чек арасы аркылуу үчүнчү өлкөлөргө бара жаткан товарлардын транзиттик агымына күчөтүлгөн контролду киргизсин.
