Кечээ, 6-сентябрда КР Тышкы иштер министри Жээнбек Кулубаев Сауд Араб Падышалыгына болгон иш сапарынын алкагында Эр-Рияд шаарында Сауд Арабиянын Соода-өнөр жай палаталары федерациясынын төрагасы Ажлан бин Абдулазиз Аль-Ажлан менен жолугушту. Бул тууралуу ТИМдин маалымат кызматы кабарлады.

Тараптар кыргыз-сауд кызматташтыгынын жогорку динамикасын белгилешип, эки өлкөнүн ишкерлеринин ортосунда соода-экономикалык жана инвестициялык байланыштарды түзүү зарылдыгын белгилешкен.

Буга байланыштуу тараптар, быйыл кыргыз-сауд экинчи бизнес форумун жана биргелешкен өкмөттөр аралык комиссиянын кезектеги жыйынын жогорку деңгээлде өткөрүүнү макулдашышты.

“Министр Кулубаев, КРнын энергетика, жер казынасын пайдалануу, мейманкана бизнеси жана башка чөйрөлөрдөгү инвестициялык мүмкүнчүлүктөрүнө токтолуп, ошондой эле кыргыз тараптын Сауд Арабияга ата мекендик продукцияны экспорттоону көбөйтүүгө жана өнүктүрүүгө кызыкдар экендигин белгиледи. Ошондой эле эки өлкөнүн ортосунда түз үзгүлтүксүз аба каттамдарын эртерээк ачуу зарылдыгына басым жасалып, туризм тармагын өнүктүрүүгө көңүл бурулду”, – деп айтылат маалыматта.

Ведомство жолугушуунун жыйынтыгында тараптар тыгыз байланышта болуп, кыргыз-сауд ишкерлер Кеңешин түзүү боюнча келишимди кол коюуга даярдоону макулдашышканын да кошумчалады.

Кошумча окуңуз:

Сауд өнүктүрүү фондунун жеңилдетилген насыясына Бишкекте балдар үчүн тез жардам ооруканасы курулат

Сауд өнүктүрүү фонду КРда мындан ары да социалдык долбоорлорду ишке ашыруу ниетин билдирди

Сауд өнүктүрүү фонду Кыргызстандын 87 миң долларлык карызын төлөөнү 2027-жылга чейин узартат

Сауд өнүктүрүү фондунун акчасына Кыргызстанда төрт мектептин курулушу аяктады.