Транспорт министрлиги Бишкек – Ош жолундагы тоннелдерден өткөн автоунаалардан алынуучу төлөмдүн көлөмүн аныктады. Тиешелүү мыйзам долбоору коомдук талкууга коюлду.

Бул демилге аталган жолдун тоннелдерин талаптагыдай тейлөө жана эксплуатациялоо максатында сунушталууда. Ведомство унааларды алты категорияга бөлүүнү сунуштап жатат жана алардын ар бири үчүн төлөнүүчү акынын өлчөмү аныкталды:

• жеңил унаалар, микроавтобустар, джиптер – 50 сом, чет өлкөлүк номурлуу унаалар үчүн 5 доллар
• жүк көтөрүмдүүлүгү 3 тоннага чейинки микроавтобустар жана жүк ташуучу унаалар – 100 сом, чет өлкөлүк номурлуу автоунаалар үчүн 10 доллар
• 22 орунга чейинки автобустар жана жүк көтөрүмдүүлүгү 3 тоннага чейинки жүк ташуучу унаалар – 150 сом, чет өлкөлүк номурлуу жеңил унаалар үчүн 20 доллар
• 22ден 32 орунга чейинки автобустар жана жүк көтөрүмдүүлүгү 10 тоннага чейинки жүк ташуучу унаалар – 300 сом, чет өлкөлүк номурлуу жеңил унаалар үчүн 40 доллар
• 32ден ашык орундуу автобустар жана жүк көтөрүмдүүлүгү 25 тоннага чейинки жүк ташуучу унаалар – 350 сом, чет өлкөлүк номурлуу жеңил унаалар үчүн 60 доллар
• жүк көтөрүмдүүлүгү 25 тоннадан ашкан жүк ташуучу унаалар – 400 сом, чет өлкөлүк номурлуу автоунаалар үчүн 80 доллар.

Унаалардын өтүүсүнө акча чогултуу Бишкек – Ош унаа жолундагы “Сосновка” жана “Кара-Көл” посттору аркылуу жүргүзүлөт. Бул үчүн атайын мамлекеттик орган аныкталат.

Бийлик ошондой эле жол баракчаларын жана тиешелүү уруксат кагаздарын көрсөткөн учурда жыйым төлөөдөн бошотулуучу унаалардын категорияларын да аныктады. Булар:

• шашылыш медициналык жардам
• мамлекеттик органдар
• Кыргыз азиздер жана дүлөйлөр коому, КРдагы Улуттук Кызыл Жарым Ай коому
• тиешелүү документтерге ылайык, гуманитардык жардамдын жүктөрүн алып жүргөндөр
• жашаган жери жана жер үлүшү бар экендиги жөнүндө маалыматтарды камтыган жергиликтүү бийлик органдарынан берилген маалымкатты көрсөтүү менен айыл чарба продукциясын өндүрүүчү тарабынан түздөн-түз өстүрүлгөн айыл чарба продукциясын ташуучулар
• транспорт жана коммуникациялар чөйрөсүндөгү ыйгарым укуктуу мамлекеттик органдын жол органдарынын өкүлдөрү
• чет мамлекеттердин КРдагы дипломатиялык өкүлчүлүктөрү жана консулдук мекемелери, ошондой эле эл аралык уюмдар.

Чүй облусунун Жайыл районунун Сосновка, Кайырма, Бексе-Жол, Бекитай, Моңолдор, Сары-Булак жана Кызыл-Дыйкан айылдарынын, Тунук, Суусамыр, Биринчи Май, Кожомкул жана Кызыл- Суусамыр өрөөнүндөгү Ой жана Жалал-Абад облусунун Кара-Көл шаарынын тургундары жашаган жери боюнча транспорттук каражаттын каттоо документтери бар болсо, 50% жеңилдик менен акы төлөөдөн бошотулат.