Минкаб суусундуктарды, улуттук ичимдиктерди өндүргөн компаниялардан жер алдындагы сууну пайдаланганынан 2% салык алууну көздөөдө. Бул тууралуу Финансы министринин биринчи орун басары Илияз Иманбетов кечээ, 27-сентябрда Отун-энергетикалык комплекс, жер казынасын пайдалануу комитетинин жыйынында билдирди.

Жыйында баяндама жасаган Иманбетов “Салыктык эмес кирешелер” жөнүндөгү кодекске өзгөртүүлөрдү киргизүү зарылчылыгын айтты. Анын айтымында, мисалы, алкоголдук жана алкоголдук эмес, ошондой эле улуттук ичимдиктерди өндүрүүгө мамлекеттин кени – жер алдындагы суу колдонулат.

“Жогоруда аталган ичимдиктердин сатылган көлөмдөрү дагы чегерүүлөрдү эсептөөдө эсепке алынбайт. Ушуга байланыштуу чегерүүлөрдү эсептөөдө – пайдалуу кендерди сатууда алардын көлөмүн толук камтуу үчүн кодекстин 128-беренесине өзгөртүүлөрдү киргизүү зарылчылыгы келип чыкты.

Мисалы, “Шоро” сыяктуу суусундук чыгарган ишканалар сууну сатып алса, ал төлөнүп жатат, ал эми өздөрүнүн территориясында казып чыгарып алса, төлөнбөй калып жатат. Биз мына ушул өздөрү казып чыгарып алып жаткандарга 2% салык киргизели деп жатабыз. Мындан жылына эң кеминде 200 млн сомдон бюджетке акча түшөт”, – деди ал.

Депутаттардын уруксат кагазы жок эле сууну кантип чыгарып алышат деген суроосуна Иманбетов алар лицензия менен иштей тургандыгын, сууну чыгарып алып, андан ары продукция жасаганга чейин ортодо эч нерсе төлөнбөй калгандыгын кошумчалады.

Баяндамачынын айтымында, сунушталган өзгөртүүлөрдү киргизүү суу ресурстарын жана суу объектилерин пайдалангандыгы үчүн жыйымды төлөө үчүн укуктук мамилелердин бардык катышуучулары тарабынан анын ченемдерин бирдей колдонууну камсыз кылат.

Комитетте каралган «Салыктык эмес кирешелер жөнүндө КРнын Кодексине өзгөртүүлөрдү киргизүү жөнүндө» мыйзам долбоору экинчи окууда каралып, колдоо тапты.