Тогуз айда мыйзамсыз курулуштарга 10.8 млн сом айып салынган - анын 4 млн сому гана өндүрүлдү
Үстүбүздөгү жылдын тогуз айында Архитектура, курулуш жана турак жай-коммуналдык чарба мамлекеттик агенттиги тарабынан мыйзамсыз курулуштарга 10 млн 82 миң сом айып салынган. Бул тууралуу Архитектура, курулуш жана турак жай-коммуналдык чарба мамлекеттик агенттигинин директорунун орун басары Алтынбек Бегалиев билдирди.
Анын берген маалыматына таянсак, учурда алардан 4 млн сом өндүрүлгөн.
«Мамлекеттик агенттик тарабынан курулушту көзөмөлдөө линиясы боюнча 421 текшерүү жүргүзүлүп, 141 өз алдынча курулуш объектилери аныкталган», – деди ал.
Бегалиев тогуз айдын жыйынтыгы боюнча курулуп жаткан объектилердин реестрине 3613 имарат жана курулуш киргизилгендигин, анын ичинен 2675 капиталдык курулуштун тизмесине, 938 чакан курулуш объектердин тизмесине киргизилгендигин айтып өттү.
Ошондой эле Мамкурулуш тогуз айда 420 курулуш лицензиясын берген.
Мамкурулуштун директорунун орун басары Жолдошбек Абдыраевдин айтымында, 420 лицензиянын 416сы юридикалык жактарга, төртөө жеке ишкерлерге берилген. Жалпысынан 304 уюм биринчи жолу лицензия алган.
«Курулуш тармагындагы адистерге 1688 мамлекеттик квалификациялык сертификаттар берилди. Баштапкы – 647, мөөнөтсүз – 1041. Имараттардын энергия натыйжалуулугу боюнча энергоаудитордук адистин 21 сертификаты берилди», – деди Абдыраев.
Ошондой эле Мамкурулуштун өкүлдөрү 2021-жылы 520 уруксат кагазы берилгенин, анын 375ин бейөкмөт уюмдар алганын кошумчалады. Ошол эле учурда алардын 70%га жакыны жаңы түзүлгөн уюм болгон.
