Монополияга каршы агенттикти материалдык жактан колдоого өзүнүн кирешесинен 19 млн сом бөлүнүп берилет. Бул тууралуу кечээ, 17-октябрдагы Жогорку Кеңештин Бюджет, экономикалык жана фискалдык саясат боюнча комитетинин жыйынында айтылды.

Жыйында Финансы министринин биринчи орун басары Руслан Сүйналиев министрлер кабинетинин 2022-жылдын 7-октябрындагы 542-тескемеси макулдашууга киргизип жаткандыгы тууралуу баяндама жасады.

“Ал тескемеге ылайык, Монополияга каршы жөнгө салуу кызматына аны өнүктүрүү жана материалдык жактан камсыздоо үчүн алардын кирешесинен 19 млн 239 миң сом бөлүп берүү боюнча аталган тескемени колдоп берүүңүздөдү суранабыз”, – деди Сүйналиев.

Жыйында депутат Дастан Бекешев Монополияга каршы агенттиктин төрагасынан алардын кирешеси каяктан келип жатканына кызыкты.

“Бул негизинен жөнгө салуу чөйрөлөрдөн, негизсиз киреше алгандардан келген. Ал эми административдик айып пулдар 100% бюджетке кетет. Мисалы, “Кыргызаэронавигация” деген ишкана бар, алар биз койгон баадан ашыкча кылып, негизсиз киреше алган. “Унаа” мамлекеттик мекемесинин тарифтерин түшүрүп, 38 млн сом бюджетке чегергенбиз”, – деди агенттиктин төрагасы Кеңешбай Тайлаков.

Жыйындын соңунда комитетте аталган тескеме колдоо тапты. Андан соң комитеттин төрагасы Данияр Толонов жабык эшик артында карай турган 3 маселе бар экендигин айтып, камераларды, микрофондорду өчүргүлө деген буйругун берди.