«Аю» спирт заводу менен арак заводу конфискацияланып, мамлекетке өттү - Садыр Жапаров
«Аю» компаниясынын спирт заводу менен арак заводу конфискация болуп, мамлекетке өтүп жатат. Бул тууралуу президент Садыр Жапаров «Кабар» агенттигине берген интервьюсунда айтты.
Жапаровдун айтымында, мамлекет «Аю» компаниясын 2.5 жылдан бери «эркелетти». Бирок ал салык төлөгүлө деген өтүнүчтөрдү укпай, алкоголдук ичимдиктерди мыйзамсыз ташууну уланткан.
«Мурдагыдай эле миллиондогон салыктарды төкпөй, акцизди жасалма кылып, 12 миң даана жасалма акциз менен кармалды. Контрабанда спирт чыгарып, 275 тонна спирт менен кармалды. Баасы 40 млн сомдон ашык болот. Анан эми спирт заводу менен арак заводу мыйзам чегинде конфискация болуп, мамлекетке өтүп жатат. Мындан ары спиртти да, аракты да мамлекет чыгарат», — деди Жапаров.
