Парламенттик делегация Малайзиянын Эл аралык соода-өнөр жай палатасынын өкүлдөрү менен жолугушту. Бул тууралуу ЖК маалымат кызматы маалымдады.

Белгиленгендей, жолугушууда мамлекеттер аралык соода байланышын чыңдоо жана биргелешкен инвестициялык долбоорлорду ишке ашыруу маселелери талкууланды.

Транспорт, коммуникациялар, архитектура жана курулуш боюнча комитетинин төрагасы Мурадил Сыдыков жагымдуу инвестициялык климатты түзүү боюнча Кыргызстанда көрүлүп жаткан чаралар тууралуу маалымат берди. Муну менен катар чет элдик инвесторлорго зарыл болгон кепилдиктерди жана жеңилдиктерди берген мыйзамдык база түзүлгөнүн маалымдады.

Өз кезегинде Малайзиянын Эл аралык соода-өнөр жай палатасынын өкүлдөрү да Кыргыз Республикасы менен кызматташууга кызыкдар экендиктерин билдиришти. Тагыраагы, Борбордук Азия өлкөлөрү менен ишкердик тармагында кызматташууну кеңейтүү маселеси изилденип жатканын, алаканын артыкчылыктуу багыттарын аныктоо максатында жакынкы аралыкта малайзиялык ишкерлердин чоң тобу Кыргызстанга жөнөтүлөрүн белгилешти.