Жогорку Кеңеште Мамкурулуштун жетекчисин кызмат ордунан бошоттуну сунушталды
Жогорку Кеңештин укук тартиби, кылмыштуулук менен күрөшүү жана коррупцияга каршы аракеттенүү боюнча комитети Мамкурулуштун директорунун кызмат ордун кароо маселесин көтөрдү.
Маалыматка ылайык, талкуу маалында депутат Эмил Жамгырчиев жетекчинин комитетте жасаган баяндамасын сынга алып, негиздүү фактыларга көңүл бурулбаганын белгилесе, дагы бир депутат Чыңгыз Ажибаев Баткен облусунда курулуп жаткан турак жайлардын сапаты жана сарпталган каражаттар боюнча маселе көтөрдү. Бирок Архитектура, курулуш, жана турак жай-коммуналдык чарба мамлекеттик агенттигинин директору Мырзабек Жапаркулов бул багытта алдыдагы күндөрү толук маалымат болот деп жооп берди.
Депутат Искендер Матраимов болсо аймактарда курулуш тармагына тиешелүү маселелер курч болуп турган чакта, жетекчинин чет өлкөгө байма-бай иш сапарларына чыгуусун сындап, агенттиктин директорун өз ишине татыксыз деп сыпаттады.
«Учурда кайсыл аймакта, канча курулуш жүрүп жатканын толук билбейсиз, кайрылуу каттарга дурус жооп бербейсиз. Президент ишенип, жооптуу кызматка дайындаган жетекчинин иш-аракетинен жыйынтык жок»,- деди Искендер Матраимов.
Талкуунун жыйынтыгында комитет мүчөлөрү агенттиктин директорунун кызмат ордун кароону министрлер кабинетине жөнөтүү сунушун колдошту.
