2025-жылы Кыргызстанда QR төлөмдөрүнүн көлөмү 900 млрд сомдон ашкан
Кыргызстанда накталай эмес төлөмдөрдүн үлүшү өсүп, QR-код аркылуу жүргүзүлгөн операциялардын саны жана көлөмү рекорддук көрсөткүчтөргө жеткен. Бул тууралуу Улуттук банктын 2025-жылдагы ишинин жыйынтыгы боюнча маалыматта белгиленген.
Билдирүүлөргө караганда, былтыркы жылы 2024-жылга салыштырмалуу QR-код аркылуу жүргүзүлгөн акча которуулардын саны 8,1 эсеге көбөйүп, 525,1 млн операцияны түзгөн. Ал эми төлөмдөрдүн жалпы көлөмү 10,7 эсеге өсүп, 908,6 млрд сомго жеткен.
Улуттук банк бул көрсөткүчтөрдү калк арасында мобилдик банкинг, интернет-банкинг жана QR-төлөмдөрдү колдонуу маданиятынын кеңейиши менен байланыштырууда. Санариптик төлөм кызматтарына болгон суроо-талаптын өсүшү өлкөдөгү финансылык кызматтардын жеткиликтүүлүгүн да жогорулатууда.
2025-жылы Улуттук банк накталай эмес эсептешүүлөрдү колдоо максатында -мобилдик тиркемелер, интернет-банкинг жана QR-код аркылуу жүргүзүлгөн төлөмдөр үчүн комиссияларды алып салуу мөөнөтүн узарткан. Ошондой эле эл аралык акча которуулар боюнча дагы комиссиялар токтотулган.
