Мамлекеттик өнүктүрүү банкы уставдык капиталын бир айда эки жолу көбөйттү — Меганы сатып алуу үчүн
Мамлекеттик өнүктүрүү банкы уставдык капиталын бир айдын ичинде экинчи жолу дагы 5 млрд сомго көбөйттү. Тиешелүү чечимди КР Өнүктүрүү институту 24-августта акционерлердин кезексиз жыйынында кабыл алды. Бул тууралуу Кыргыз фондулук биржасы билдирди.
Мамлекеттик өнүктүрүү банкынын акционерлери 24-августтагы кезексиз жыйынында уставдык капиталын дагы 5 млрд сомго, тагыраак айтканда, 7 миллиарддан 12 млрд сомго чейин көбөйтүү чечимин кабыл алышты. Капитал август айынын башындагыдай эле жөнөкөй акцияларды чыгаруу жолу менен көбөйтүлөт. Бир акциянын жайгаштыруу баасы 1 миң сомду түзөт.
Эске салсак, 4-августта да Мамлекеттик өнүктүрүү банкынын акционерлери уставдык капиталды 5 млрд сомго көбөйтүү чечимин кабыл алышкан. Ошону менен бирге акционерлер жалпы суммасы 14.6 млрд сомдук мамлекеттик баалуу кагаздарды сатып алуу-сатуу боюнча компаниянын активдеринин баланстык наркынын 50%дан ашкан ири бүтүмдөрдү түзүүнү чечишти.
Мамлекеттик өнүктүрүү банкы "Альфа Телеком" (Mega бренди менен иштеп жаткан) сатып алуу үчүн уставдык капиталын көбөйтүүдө. Мамлекеттик уюлдук байланыш компаниясынын болжолдуу баасы болгону 14.6 млрд сомду түзөт. Кошумчалай кетсек, президенттин басма сөз катчысы Эрбол Султанбаев Мамлекеттик өнүктүрүү банкы "Альфа Телекомду" сатып алууну пландап жаткандыгы тууралуу маалыматты айткан болчу.
Назира Абдиева
Назира АбдиеваЧынгыз Керимбеков
