Садыр Жапаров “Борбордук Азия + Япония” Диалогунун Биринчи саммитине катышты
Кыргыз Республикасынын Президенти Садыр Жапаров бүгүн, 20-декабрда, Японияга болгон расмий иш сапарынын алкагында Токио шаарында өтүп жаткан “Борбордук Азия + Япония” Диалогунун Биринчи саммитине катышты.
Мамлекет башчысын Япониянын Премьер-министри Санаэ Такаити Токио шаарындагы "Акасака" мамлекеттик конок үйүнөн тосуп алды.
Саламдашуу аземи жана биргелешип сүрөткө түшүү аяктагандан кийин делегациялардын башчылары саммитке катышуу үчүн залга өтүштү.
Анын жүрүшүндө Президент бүгүнкү саммит Борбордук Азия өлкөлөрү менен Япониянын ортосундагы өнөктөштүктү сапаттык жаңы деңгээлге чыгарууга болгон жалпы умтулууну билдирерин белгиледи.
"Бул диалог түзүлгөндөн бери Борбор Азия экономиканын бардык тармактарында туруктуу экономикалык өсүштү жана өнүгүүнү көрсөткөн өзүн-өзү камсыз кылган аймакка айланды. Оң динамиканын шартында биздин өз ара аракеттенүүбүздүн натыйжалуу жана узак мөөнөттүү форматтарын түзүү өзгөчө мааниге ээ болууда”, - деди Садыр Жапаров.
Ал Кыргызстан “жашыл” экономикага, кайра жаралуучу энергетиканы жана таза технологияларды өнүктүрүүгө умтуларын белгилеп, «Камбар-Ата – 1» ГЭСин негизги стратегиялык долбоор катары атады. Ошондой эле япондордун “жашыл”технологияларын трансферлөөгө жана экологиялык долбоорлорду каржылоонун жаңы механизмдерине кызыкдар экенин билдирди.
Мындан сырткары Садыр Жапаров Кыргызстан Япония менен маалыматтык технологиялар жаатында кызматташууга даяр экенин билдирип, Кыргызстандын Жогорку технологиялар паркы биргелешкен санариптик долбоорлорду ишке ашыруу, алдыңкы япон технологияларын трансферлөө, ошондой эле инженердик жана IT-кадрларын даярдоо үчүн аянтча болоорун белгиледи.
Президент өз сөзүндө Япония менен кызматташуунун негизги артыкчылыктарынын бири адам ресурстарын өнүктүрүү экенин да белгилеп, JDS программасынын жыйынтыктарын жогору баалады. Анын бүтүрүүчүлөрү көп жылдар бою өлкөнүн өнүгүшүнө салым кошуп келишкенин ырастап, Япониянын алдыңкы университеттеринде, биринчи кезекте маалыматтык технологиялар жана инженерия багыттары боюнча билим берүү квоталарын кеңейтүүгө кызыкдар экенин билдирди.
Садыр Жапаров сөзүнүн аягында Кыргызстан жыл бою туристтик сезонду түзүү максатында туристтик инфраструктураны ырааттуу өнүктүрүп жатканын баса белгилеп, «Ала-Тоо Резорт» ири тоо лыжа базасынын долбоору ишке ашырылып жатканын айтып, Япониялык өнөктөштөрдү анын өнүктүрүүгө катышууга чакырды.
